Heb 8 | KYG | STEP | Inagi mani avo'mo nekaona gemo aepa'amo hane'niyana agaemo ani agufa hogote vekamo mono huno nelateya vekamo mai'niye. Agaemo ala kini vekamo'mo yagaino ne'apateya sia'ale'mo lamaga haopale'mo koku'napi'mo fai mai'niye.

Hebrews 8

1 Inagi mani avo'mo nekaona gemo aepa'amo hane'niyana agaemo ani agufa hogote vekamo mono huno nelateya vekamo mai'niye. Agaemo ala kini vekamo'mo yagaino ne'apateya sia'ale'mo lamaga haopale'mo koku'napi'mo fai mai'niye. 2 Agaemo mago aune seli nopi'mo ali'ya'mo no'alifa aote mono nopi'mo lama ge aote seli mono nopi'mo ali'ya'mo ne'aliye. Ma mopafi vaya'mogi ani seli mono no'mo oki'nafa Ala kava ne'moke'mo ki'niye. 3 Goti'mo fiku ne'amiya ya'mo amige afumo he'a ofalinimo amige hu'a amisayafe'mo muki hogote vaya'mogi mono hu'a apatesaya vaya'mo lekana paino apate'niye. Ani kava huno mani vekamo'a ofalinimo amisiya ya'mo hane'niye. 4 Mono hu'a ne'apataya vaya'mogimo ke'aepa gelefe'mo fiku ami'nae. Apakaemo hemenimo ali'ya'mo ne'aliya'mofe'mo agaemo hemenimo ma mopafi'mo mai'niyesinana mono huno nelateya vekamo o'mai'niyesine. 5 Mosese'a ani seli mono no'mo kisiyafe'mo nehigeno'ae'mo Goti'a, avele'mo mai'nanage'nae'mo ago ali'na kave li'novanagi ani kava huka ageka alagepa huka aune ya'mo alo huvo, huno ha pai'niye. Apakaemo koku'napi hane'niya mono nokana huno hane'niya agufa aune nopi'mo ali'ya'mo ne'aliye. 6 Ne'aliya'monanafa hemenimo agaemo aeno agase'niya ali'ya'mo aliteno kotalake gemo folagapi vekamo mai'niye. Ani kotalake gemo'a atafa kotalake gemo ago aeno agase'niye. Goti'a, lapa maegauve, huno hu male'niya polomasi ge'aleti'mo saufa kotalake gemo alino he tino ate'niye. Saufa kotalake gemo lapa maegauve, huno hu male'niya polomasi ge'amo'mo atafa kotalake gemo lapa maegauve, huno hu male'niya polomasi gemo ago aeno agase'niye. 7 Hogote kotalake gemo'a alagepa huno hapa mae'niyesinana henaga kotalake gemo ali'ya'amo ohane'niyesina'monanafa 8 kotalake ge'amo ago amagi'a atale'naya'mofe'mo Ala kava ne'mo Goti'a,

Afiyo, mago afina'mo afole aisige'nae'mo saufa kotalake gemo Isaleli vaya'aitega'e Yuta vaya'aitega'e'mo hu malegauve. 9 Apakinago vaya'mo Isipi kotegati'mo apayate ali'na apavaleli'na e'nova afina'mo hu male'nova agufa kotalake gemo osuguve. Apakaetefe'mo hu male'nova kotalake gemo akame osu'a amagi'a atale'nage'nae'mo yagai'na o'apate'na afa'a apatale'nove. 10 Inagi ani afina'mo hano hutesige'nae'mo Isaleli vaya'aitegamo kotalake gemo hu malete'nae'mo ke'aepa ge'nimo ali'na apakesafi'mo malete'na apaipafi'mo avo'mo kae malegauve. Goti'apimo'namo maisuge'a nagai'ni vaya'nimo maigae. 11 Ani afina'mo muki ala apaki vaya'e aise apaki vaya'mogi'e'mo nagaemo nage'a aeto hugaya'mofe'mo muki vaya'amogimo apao vaya'e konaga'apimogi'e'mo, Ala kava ne'mo agetapa aeto hiyo, hu'a ali'a apaya o'malegae. 12 Hosu kava'apie'mo nahau hu'na apatete'na hosu kava'api'e ke'aepa ge'nimo amagi'a ne'atalaya kava'apile'efe'mo nagesamo o'afi'na nage kani'na atalegauve,
huno hu'niye. 13 Goti'a mani kotalake gee'mo,saufa kotalake ge'nimae, huno hu'niya'mofe'mo hogote kotalake gemo atafa he'nigeno ali'ya'amo ago hano hu'niyanageno aise afina'mo maino alagi hano hugiye.